Set du dee doon!
In Shaetlan some imperatives is expressed reflexively:
– Come du dee!
– Set du dee doon!
Dis is wint tae be da wye wi verbs at haes some kind o cheinge o location somewye or idder, laek come, ging, haste, sit doon, etc. As weel as dat, da StE equivalents is wint tae be da kind at doesna tak a object (laek in "I'm comin" or "I'm sitting down" de'r nae object, onn'y da action an da dø-er; whit dey caa intransitive verbs), but in Shaetlan dey dø tak a object: da spaekker. Dis is seemlar tae parteeclar kinds o verbs idda Scandinavian languages at's reflexive an aa, laek da posture verbs att sätta/ställa/lägga sig 'tae sit doon/staand up/lie doon' (lit. "tae set eensel doon/staand eensel up/lie eensel doon). Da Shaetlan wye o makkin commaands fir dis kinds o verbs in dat wye looks braaly unkan fae da StE wye. Tae "correct" dis kinds o imperatives wid be wrang: de'r naetheen wrang wi dem an d'ir weel formed imperatives athin da Shaetlan grammar.
PS:
Da expression
– Come du (dee) wis!
includes da spaekker athin da commaand an is technically no a imperative but whit dey caa a hortative. Becis da spaekker is includit in da commaand, da reflexive pronoun is wis. Da Shaetlan reflexive pronouns hae a lang form (deesel, wirsels, etc) an a short form (dee/wis etc). But mair aboot dis in a separate posst! 🤓
