See du dat!

Imperatives is grammatical wyes o shaain commaands. Imperative clauses is wint tae be maed up in a wye at isna da sam as declarative clauses (staetments) an interrogative clauses (questions). Fir example, in StE staetments an questions haes a visible subject:

– You are writing.

– Are you writing?

But no imperatives:

– Write!

In StE you onn'y git da subject pitten in it noo an agein fir emphasis in a comaand (somethin laek "You write (now)!"). In dat caesses da subject comes afore da verb.

In Shaetlan da default wye o expressin commaands is wi da subject, an da subject comes efter da verb:

– Write du! / Write you!

Dis is da sam as da wye dey wirk wi imperatives in Icelandic, whaar a form o "you" is eekit on tae da verb stem:

– Skrifaðu! / Skrifiði! ('Write! [singular] / [plural])

Da pronouns þú / þið is come tae be verb endeens in reduced forms.

In Aald Norse da imperative subject wis optional but you saa it a lok. In Aald English da imperative subject wis optional an aa, but you seldom ivver saa it. Da Shaetlan imperatives micht in dat wye be a ormal o da Norn grammar.

PS: As weel as dis Shaetlan haes imperatives wi da structure Come du dee! But yun structure isna øsed fir ivvry kind o verb or context an hit's a maitter fir anidder posst. 🤓

Pic: Sage Ross licent under CC BY-SA 4.0