Comparin as an ir

Conjunctions is peerie wirds at conneks entities. Comparative conjunctions is øsed fir comparin things. So idda StE sentence He's smaller than me da peerie wird than is da conjunction. In Shaetlan da comparative conjunction is wint tae be as, laek He's peerier as me. Dis is a braaly aald form an øsage, an hit can be fun in da German als firbye, laek Er ist kleiner als ich ('He is peerier as me'). Bit fir a braa twartree spaekers da naiteral form is ir, laek He's peerier ir me. Dis is aald an aa, an it gings back til a waikened form o nor (conjunction). A sentence laek "he is peerier dan me" wid shaa a lonn o StE than. Tae "correct" as/ir til somethin laek "dan"/"than" widna be richt: as/ir shaas da original forms an shaas richt Shaetlan grammar.