Yül

History athin a wird. Shetland micht be spokken aboot as bein remote but da truth is it's ey been a central plaess, an troo da history o Shaetlan contact wi idder languages is nivver aesed. Da wird Yül (Yøl/Yöl; or Yule athin StE) is a braaly aald Germanic wird. In Aald English hit wis geól (aerlier hit wis geohol), in Aald Norse hit wis jól, de'r a Gothic form jiuleis attestit, an even a Aald Anglian giuli. Dey aa derive fae da Proto-Germanic *jeul-/*jeXul-/*jehwlą. Da meanin is debaetit, hit micht'll a been 'da festivities', an wis set tae mean da winter saison (fae aboot December tae Janiwirry). Whaar it cam fae afore dat we dunna ken. Da Aald Norse jól meant da pre-Christian foy at lestit 12 days idda herthol o da winter.

🌟

Music: Da Day Dawn, tradeetionally played apø Christmas moarneen in Shetland. Played here by Tammie Anderson. Øsed wi da kind permeesion o Charlie Simpson an da Shetland Museum an Archives.

🌟

Fae IHD wi love: a Güd Yül tae you aa! W'ir hoopin at da New Year fins you blyde an in fine fettle.