Reestit mutton

History athin a wird. Da snüds an wups idda vaige o a wird is fascinatin. Idda herthol o da caald, raa an dark Yül, naethin can baet a bowel o haet reestit mutton soup. Da wird reestit is maed a full roond trip o da Nort Sea. Da Aald Scots reist 'tae smok dry, cure' is attestit fae 1508. Hit micht be a Scandinavian lonn: Danish/Norwegian riste, Swedish rista aa means 'tae cook ower a grid', an Faeroese ræst 'air dry, hing cure, ferment' is braaly closs ti' da Shaetlan an Orcadian reest 'cure, dry ower haet'. Da ultimate origin fir dem aa is Middle Low German. rôsten / Middle Dutch rôosten 'tae rosst', fae Aald Saxon *rōstian, an hit ultimately comes fae Proto-Germanic *raustijan 'tae rosst'. Da wird evolved tae mean whit da fleish itsel wis rosstit or cured apün firbye, maist affen a grid or framewark o some kind. In Shetland dat wis a widden framewark whar da mutton hang tae cure it bi smok-dryin it. Da reestit mutton, dan, is laekly tae be a Hansa lonn aroond da Nort Sea, whar ivvry community is taen an cheinged da meaneen ti' da wye o wirkin wi it at wrocht best in dat plaess