Purpise claases

Adverbial complement claases is claases at wirk laek units ithin anidder claase (see wir posst fae 18 Mey). Dey cheinge da verb idda main claase. Ee kind o adverbial complement claase wirks bi shaain da purpise o a action. Athin Standirt English dis is pitten across wi da infinitive o da verb idda complement claase:

– Mary went to town to get groceries.

Da adverbial complement claase [to get groceries] expleins whit wye Mary geed ti’ da toon, so it says da purpise o da action idda main claase. In Shaetlan da purpise claase is seid a peerie bit different, wi a fir tae-construction:

– Mary geed ti' da toon fir tae git da airrants.

In Shaetlan da adverbial complement claase [fir tae git da airrants] staets at da purpise o da action o da main claase. A lok o non-standirt English an Scots varieties aroond da wirld hae a fir tae-construction fir purpise claases. Hit's nidder new, or slang or a døless wye o spaekin, an hit's attestit in English fae 1127. You'll fin it in Chaucer's Canterbury Tales an da 1535 Bible an aa, fir example. Hit's a peerie grammatical wye o shaain a claase at staets da purpise o a action. Tae "correct" it wid be wrang.