I pat pitten, bit I sud a pitten put!

Aa Germanic languages haes twa main kinds o verbs: reglar ("waik") verbs an irreglar ("strong") verbs. In StE reglar verbs forms dir past tense an past participle wi da endeen -(e)d, as in fill (to fill in a form) ~ filled (I filled it in yesterday) ~ filled (it has been filled in with a red pen). Hoosumivver, irregular verbs isna formed wi -e(d), d'ir formed in twartree idder wyes. Ivver sae aft da vowel'll cheinge, as in tell (to tell a story) ~ told ~ (I told him a story) ~ told (that story has been told already). Bit whit parteeklar verbs comes tae be reglar an whit eens comes tae be irreglar isna ey da sam atween languages.

Laek aa Germanic languages, Shaetlan haes reglar an irreglar verbs baith an aa. Reglar verbs is formed wi eider -(e)d or -(i)t:

owse 'bale out, empty' (tae owse oot o da essibag) ~ owsed (I owsed him oot dastreen) ~ owsed (A'm jüst owsed oot o him)

tell (tae tell a story) ~ tellt (He tellt me dastreen) ~ tellt (A'm jüst bøn tellt).

Irreglar verbs is formed in idder wyes, an, laek da wye it is wi idder Germanic languages, da vowel aft cheinges:

jimp (tae jimp ower a fence) ~ jamp (we jamp ower da fence dastreen) ~ juppen (w'ir jüst juppen ower da fence)

Da reglar/irreglar verbs doesna fairly owerlap atween an StE. Neider system is mair "richt" as da tidder or ony idder Germanic language. Aa it is, is d'ir different systems.