sae vs so

Shaetlan haes twa wirds at baith can translate til Standirt English 'so': da conjunction so (pronounced /so/) an da adverb sae (pronounced /se/). Dey dunna mean da sam thing but de'r aft muddled up.

Adverbs is øsed as different kinds o modifiers. Da peerie wird sae shaas hoo muckle or hoo far:

– A'm needin a grain o clith at's sae lang [gesture]

– A'm nivver seen sae mony touries!

– Hit's no sae ill.

Conjunctions is peerie wirds at conneks entities (wirds, phrases or hael claases). Some conjunctions biggs a claase intil anidder claase an maks dem intil a element o dat idder claase. Yun kind o conjunctions is caaed subordinate conjunctions. Da peerie wird so is øsed tae mak subordinate claases:

– I cam airly so (at) I wid hae time.

– I wis fantin so I aksed if de wir ony sassermaet.

Hit can be øsed as a cüllyin interjection an aa:

– So so!

Tae "correct" sae til so widna be richt. Dis twa wirds haes døs different jobs in Shaetlan. Tae alwis øs sae in aa poseetions widna be richt idder: dat wid be a pattren replication o Standirt English at wid tak in da Standirt English grammar an bruck da mair subtle Shaetlan grammar.