Lent o time wi in

In Shaetlan a lent o time is affen shaan wi da preposeetion in, whaaras StE haes "for":

– Da peerie red hen kempit in thoosands o ooers tae gadder her gair, wi nidder help or tanks, so eence at her cake wis feenished shø widna leet da eens at cam wi oppen mooths.

Dis is nidder new, or slang, or a døless wye o spaekkin. Da øs o in tae shaa a lent o time is attestit in Aald English fae da 10C at da laetest. Firbye dat hit's da normal wye tae pit across a lent o time idda Scandinavian languages (cf. Den lilla röda hönan kämpade i tusentals timmar...), gyaan back til da wye at Aald Norse øsed it. Da øs o in fir lents o time wis laekly reinforced becis o it bein in Norn an hit's anidder aald substratal feature at's bøn hoidin afore wir very een.

PS: fir dem at døsna ken da story, "The Little Red Hen" is a American story aboot hoo impoartant herd wark an wirkin fir yirsel is. Whin da hen fins a scaar o bere an wants tae mak a loff, naen o da idder animals on da croft wants tae help her ava. So shø plants, maas an grinnds it til hersel. Hoosumivver whin da loff is feenished da idder animals is aa keen tae glaep da hen's ain loff.